Türkmen talyplary Halkara açyk matematika internet-olimpiadasynda 6 medal gazandylar

Türkmenistanly talyplar Halkara açyk matematika internet-olimpiadasynyň jemleýji tapgyrynda 1 altyn, 3 kümüş we 1 bürünç medal gazandylar. Jemleýji tapgyr Mariý El Respublikasynyň Ýoşkar-Ola şäherinde Powolžýe döwlet tehnologiýa uniwersitetinde geçirildi. Bu barada centralasia.news habar berýär.
Medallar ugrunda 8 döwletden 56 ýokary okuw mekdepleriniň ýüzden gowrak talyby bäsleşdi. Olimpiadanyň netijeleri boýunça iň ökdeler 3 sany altyn, 14 kümüş we 25 bürünç medal gazandylar.
Türkmen talyplaryndan altyn medala Magtymguly adyndaky Türkmen döwlet uniwersitetiniň matematika fakultetiniň talyby Remezan Bagtyýarow; kümüş medallara TDU-nyň talyplary Myrat Çäşemow we Döwran Nurgeldiýew, şeýle hem Türkmenistanyň DIM-niň Halkara gatnaşyklary institutynyň talyby Akmyrat Tirkeşow mynasyp boldy. Halkara ynsanperwer ylymlary we ösüş uniwersitetiniň talyby Perman Iljanow bolsa bürünç medaly eýeledi.
Türkmen talyplaryna ýolbaşçylyk eden Halkara ynsanperwer ylymlary we ösüş uniwersitetiniň mugallymy Pirmyrat Gurbanowyň bellemegine görä, bäsleşigiň esasy formatynyň çäklerinde talyplaryň ýokary okuw mekdeplerinde alýan bilim ugry boýunça şahsy gazananlary hem bahalandyryldy. Netijede, Myrat Çäşemow «matematika» ugrunda ikinji orna, Remezan Bagtyýarow «tehnikatehnologiýa» ugry boýunça üçünji orna, Akmyrat Tirkeşow «ynsanperwer-hukuk» ygry boýunça birinji orna, Perman Iljanow «ykdysadyýet we dolandyryş» ugry boýunça birinji orna mynasyp boldy. Türkmenistana dolanyp gelenlerinden soňra, Magtymguly adyndaky TDU-da ýeňijileri sylaglamak dabarasy boldy.