Awtomobil saýlamakda onuň ygtybarlylygyna örän köp üns berilýär. Çünki her bir sürüji ulagynyň döwülmezligini, tehniki babatda mesele çykarmazlygyny isleýär. Ýöne sürüjiniň endikleriniň awtomobiliň ygtybarlylygyna ýetirip bilýän täsiri barada hemmeler oýlanyp baranok. Eýsem, awtomobiliň ömrüni uzaldyp biljek bu endikler haýsy?
1. Dwigateliň we geçiriji karobkanyň ýagyny yzygiderli çalşyp durmak
Dwigateldäki we geçiriji karobkadaky ýag sürtülýän üstleri ýaglamak we sowatmak üçin niýetlenendir, şeýle hem ol poslamadan goraýar. Uzelleriň iş mahalynda dürli görnüşli galyndylary we sandan çykan önümleri özüne siňdirip, ýag netijede wagtyň geçmegi bilen öz güýjüni ýitirýär. Bular ýaly ýagda awtoulagy dolandyrmak onuň beýleki şaýlaryny tiz sandan çykarar. Şonuň üçin hem dwigateliň we geçiriji karobkanyň ýagyny yzygiderli çalşyp durmagy endik edinmek möhümdir.
2. Beýleki sarp ediş materiallaryny we suwuklyklary çalyşmak
Awtoulagda, motor we transmissiýa ýagyndan başga-da, yzygiderli çalyşmagy talap edýän detallaryň we suwuklyklaryň köp sanlysy bardyr. Olara — filtrler (howa, ýangyç, ýag), GRM guşagy, dürli suwuklyklar (tormoz, sowadyjy, GUR suwuklygy), tormoz kolodkalary, podweskanyň saýlentbloklary degişli. Bulary çalyşmagy endik edinmek hem zyýan etmez.
3. Awtoulagyň ýagdaýyny yzygiderli gözegçilikde saklamak
Maşynyň kapotyny aram-aram galdyryp barlamak möhümdir. Beýle etmek ýag ýa-da beýleki suwuklyklaryň akmagyny öz wagtynda bilmäge, şeýle hem homutlaryň we şlanglaryň ýagdaýyny gözegçilikde saklamaga ýardam eder. Iň bolmanda hepdede bir gezek pokryşkalaryň basyşyny barlamak maslahat berilýär.
4. Awtomobili ýuwmak
Awtoulagy yzygiderli ýuwmak ondaky täze ýemşikleri we çyzyklary ýüze çykarmaga we olary düzetmäge kömek edýär. Maşynyň salonyny arassalamak hem möhümdir. Plastikleri süpürmeli, oturgyçlaryň kožasyny ýörite serişdeler bilen arassalamaly, tertipleşdirmeli. Bu zatlary salonyň içindäki zatlaryň ömrüni uzaldar.
5. Maşyndaky ses (galmagala) üns bermek
Öz maşynyňy ünsli diňlemeli. Näsazlyk heniz ýüze çykmanka, ony öňünden bilip bolýar. Dürli jygyldylar, podweskanyň işindäki üýtgeşmeler we motordaky sesler — bular näsazlygyň golaýlaýandygyny habar berýär. Şular ýaly ýagdaýda haýal etmän, serwise gitmeli.
6. Tehniki ideg hökmanydyr
Maşynyň işiniň hili serwisdäki idege baglydyr. Şonuň üçin hem elmydama şol bir serwis merkezinden, şol bir mehanigiň hyzmatlaryndan peýdalanmak maslahat berilýär. Onuň bilen dostlaşmak zyýan etmez.
