2013-nji ýylda Türkmenistanda temmäkä garşy göreş hakynda iň düýpli, giň gerimli kanunlaryň biri kabul edildi. Temmäkä garşy göreş boýunça bu Kanunda göz öňünde tutulan çäreleriň amala aşyrylmagy uly ýaşly ilatyň arasynda çilimkeşligiň ýaýramagynyň tiz peselmegine — 2013-nji ýyldan bäri iki esse azalmagyna (2018-nji ýylda ilatyň diňe 3,4 göterimi çilim çekýärdi) getirdi. Munuň özi sebitiň ähli ýurtlarynyň arasynda iň pes görkezijidir. Bu barada Bütindünýä saglygy goraýyş guramasynyň howandarlygynda Aşgabatda geçirilen “Ýokanç däl keselleriň öňüni almak we olaryň garşysyna göreşmek” atly ýokary derejeli Ýewropa maslahatynda bellenilip geçildi. Şol maslahatda Türkmenistan keselleriň öňüni almakda güýçli hem-de yzygiderli öňdeligi üçin BSGG-niň ýokary bahasyna mynasyp boldy.
Temmäkä garşy göreşde öň hatarda bolmak jogapkärçiligi artdyrýar hem-de has-da uly sepgitlere ýetmäge borçlandyrýar. Şeýlelikde, biziň ýurdumyz öz öňünde möhüm wezipäni — 2025-nji ýyla çenli temmäki tüssesinden azat ýurt hökmünde bolmak wezipesini goýdy.
