Dünýäniň ilaty 2019-njy ýylda 7,7 milliard adama ýetdi, 2050-nji ýylda bolsa 9,7 milliarda ýeter. Bular barada BMG-niň Nýu-Ýorkdaky Baş assambleýasynda geçirilen 52-nji sessiýada aýdyldy. Şeýle hem asyryň ahyrynda dünýäniň ilatynyň 11 millard adama ýetip biljekdigi nygtaldy. Bu barada «Atavatan Turkmenistan» habar berýär.
BMG-niň Baş sekretarynyň birinji orunbasary Amina Muhammadyň aýtmagyna görä, soňky 25 ýylda dünýä ilatynyň umumy ýaşaýyş derejesi ep-esli ýokarlandy, eneleriň ölümi bolsa ozalkysyndan 40 göterim azaldy, ynsan ömrüniň dowamlylygy artdy.
“1994 ― 2019-njy ýyllar aralygynda 5 ýaşa ýetmedik çagalaryň heläkçiligi 54 göterim azaldy. Dünýä boýunça ortaça ynsan ömri” 1994-nji ýylda 64,9 ýaş bolan bolsa, 2019-njy ýylda 72,3 ýaşa çenli ýetdi. 2030-njy ýyla çenli bolsa ortaça ömür 74 ýaşa çenli uzar. Köp keselleriň, ençeme döwletlerdäki ýeter-ýetmezçiligiň öňi alyndy” diýlip, BMG-niň hasabatynda aýdylýar.
Hasabatda çaga dogluşynyň kem-kemden azalýandygyna hem üns çekildi. Häzir her enä, ortaça, 2,5 perzentden düşýän bolsa, 2030-njy ýylda 2,4 perzentden düşer.
Häzir Ýewropada 65 ýaşdan uly raýatlar ýurtdaky umumy ilat sanynyň 19 göterimini, Demirgazyk Amerikada bolsa 16 göterimini emele getirýär. 2050-nji ýylda bu göterimler, degişlilikde, 28-e we 23-e çykar.
Häzir dünýäniň ilatynyň 56 göterimi şäherlerde ýaşaýar. Geljekde şäherlileriň sany has hem artar. 2030-njy ýylda biziň 60, 2050-nji ýylda bolsa 68 göterimimiz “şäherli” bolar.
