27-nji martda АСА-nyň (Absolute Championship Akhmat) ýeke-täk türkmenistanly wekili, bu başa-baş göreş ýaryşynyň çempiony Döwletjan Ýagşymyradow Türkmenistana geldi.
Döwletjan Ýagşymyradow 16-njy fewralda Warşawada (Polşa) geçirilen ACA 92 ýaryşynda polşaly Karol Selinskiden tehniki nokaut bilen üstün çykyp, Absolute Championship Akhmatyň ilkinji çempiony hökmünde taryha girdi.
Howa menzilinden düşeninde, ýaryşlara hemişe Türkmenistanyň baýdagyny alyp çykmagynyň sebäbi soralanda, ol «men öz Watanymy örän söýýärin. Halkara ýaryşlarynda ýaşyl Tugumyz bilen çykmak meniň üçin belent mertebe» diýip jogap berdi, diýip Turkmenportal habar berýär. Türgeniň habar bermegine görä, ol ýurdumyzda 18-nji aprele çenli galar. Soň ol ýene türgenleşiklerini dowam eder.
Mundan öň, Döwletjan Ýagşymyradow 2018-nji ýylyň 5-nji maýynda Moskwada geçirilen ACB 86 ýaryşynda bu titulyň hereket edýän eýesi russiýaly Batraz Agnaýewden üstün çykyp, ACB-nyň (Absolute Championship Berkut) garyşyk başa-baş söweş boýunça çempion bolupdy.
