«Realyň» ýarymgoragçysy Kazemiro karýerasyny «Mançester Ýunaýtedde» dowam eder. Abraýly insaýder Fabrisio Romanonyň habar bermegine görä, geleşik ylalaşylypdyr. Braziliýaly türgen iňlis klubuna geçmäge razylyk berip, «Mançester Ýunaýtediň» teklibini kabul etdi. "MÝ" onuň üçin 60 mln ýewro tölär. Ýene 10 mln ýewro bonus hökmünde tölenmegi mümkin.
Ýakyn günlerde ýarymgoragçyny iňlis klubunda lukmançylyk barlagyndan geçirmek meýilleşdirilýär. Braziliýaly türgen «Realda» iň ýokary hak alýan futbolçylaryň hatarynda durýar. "MÝ" Kazemira hepdede 413 müň ýewro gazanýan Dawid de Heanyň derejesinde aýlyk bermäge taýýar.
Owal «Realyň» baş tälimçisi Karlo Ançelotti Kazemironyň topardan gitmek hyýalynyň bardygyny tassyklapdy. Italiýaly hünärmen Madridde onuň islegine düşünmek bilen garandyklaryny mälim edipdi.