ABŞ-da COVID-19-a garşy millionlarça sanjym dozasy ýok ediler

ABŞ-da COVID-19-a garşy millionlarça sanjym dozasy ýok ediler

Johnson & Johnson kompaniýasy üçin Baltimordaky Emergent BioSolutions zawodynda öndürilen COVID-19-a garşy 135 milliona golaý sanjym dozasy hil meselesi sebäpli ýok ediler. Bu barada amerikan KHBS-ine salgylanyp, “Sinhua” agentligi habar berýär. Muny m.forbes.kz ýetirýär.

Habarda bellenilişi ýaly, ýok edilmegi meýilleşdirilýän COVID-19-a garşy sanjymlar 2021-nji ýylyň awgust aýyndan şu ýylyň fewral aýyna çenli döwürde öndürildi. Johnson & Johnson kompaniýasynda barlagyň netijeleriniň bu döwürde zawodda öndürilen sanjymlaryň hil ülňülerine laýyk gelmeýändigini görkezendigi aýdylýar. Netijede, 135 milliona golaý doza ulanmak üçin ýaramly däl diýlip ykrar edildi.
2021-nji ýylda bu zawodda Johnson & Johnson-yň COVID-19-a garşy sanjymlary we Astra Zeneca-nyň Oksford uniwersiteti bilen bilelikde taýýarlan derman serişdesi öndürildi. Ýöne zawodyň işgärleri iki sanjymyň komponentlerini ýalňyşlyk bilen garyşdyrdylar, şonuň netijesinde öndürilen derman serişdesiniň 400 milliondan gowrak dozasy ýaramly däl boldy. Şunuň bilen baglylykda, ABŞ-nyň Iýmit önümleriniň we derman serişdeleriniň hiline sanitar gözegçilik boýunça edarasy (FDA) 2021-nji ýylyň aprel aýynda Baltimordaky Emergent BioSolutions zawodynda önümçiligiň togtadylmagyny talap etdi we ony 2021-nji ýylyň awgust aýynda gaýtadan dikeltmäge rugsat berdi.
Johnson & Johnson degişli fabrikada öndürilen COVID-19-a garşy sanjymlaryň önümçilige gaýtadan başlanandan soň bazara çykmandygyny we kompaniýanyň Emergent BioSolutions bilen sanjym önümçiligi baradaky şertnamasyny ýatyrjakdygyny aýtdy.