Dünýäde iň uly abuna ýazylyşygy boýunça wideo akym serwisi Netflix Inc. ikinji çärýekde 1 mln töweregi ulanyjysyny ýitirendigini hasaba aldy, şol bir wagtyň özünde kompaniýa arassa girdejisiniň we girdejisiniň ýokarlanandygy barada hasabat berdi diýip, interfax.ru habar berýär.
Metbugat relizinde habar berlişi ýaly, ikinji çärýekde tölegli serwisleriň müşderileriniň sany kompaniýa tarapyndan garaşylan 2 million azalma derek 970 müň birlik azaldy.
Kompaniýa ABŞ-da we Kanadada 1,3 mln, Ýewropada 800 müň abunaçyny ýitirendigini hasaba aldy, emma Aziýada 1,1 mln täze müşderi gazandy. Kompaniýa şu çärýekde töleg töleýän abunaçylaryň sanyny 1 mln artdyryp, 221,7 mln-a ýetirmekçi bolýar.
Şol bir wagtyň özünde kompaniýanyň arassa girdejisi aprel – iýun aýlarynda geçen ýylyň degişli döwründäki $1,35 mlrd ýa-da paý üçin $2,97 bilen deňeşdirilende, $1,44 mlrd ýa-da paý üçin $3,22 boldy. Girdeji 8,6% ýokarlanyp, $7,97mlrd-a ýetdi. Analitikler kompaniýanyň arassa girdejisiniň ortaça $8,05 mlrd girdejide paý üçin $3 derejesinde bolmagyny çaklapdylar.
Üçünji çärýekde Netflix $7,84 mlrd girdeji we paý üçin $2,14 derejesinde düşewünt almagy meýilleşdirýär. Çaklama, degişlilikde, $8,08 mlrd we paý üçin $2,77 bolmagyny göz öňünde tutýar.
Netflix-iň paýnamalarynyň bahasy sişenbe güni hasabat neşir edilenden soň 8% ýokarlandy. Kompaniýanyň kapitallaşdyrmasy bolsa ýylyň başyndan bäri üç esse, $84,8 mlrd-a çenli azaldy.