Marokko Bütindünýä bankynyň (BB) we Halkara pul gaznasynyň (HPG) ýyllyk assambleýasyny geçirmäge taýýar. Bu barada Maghreb Arab Press (MAP) habarlar agentliginiň habar bermegine görä, Dubaýda patyşalygyň Ykdysadyýet, maliýe we administratiw özgertmeleri ministri Nadiýa Fattah Alýaui aýtdy. Muny TASS ýetirýär.
Ol HPG-niň dolandyryjy müdiri Kristalina Georgiýewa bilen duşuşdy. Taraplar 2023-nji ýylyň oktýabr aýynda Marrakeş şäherinde geçiriljek BB-niň we HPG-niň assambleýasyny guramak meselesini ara alyp maslahatlaşdylar.
Bu çäre 2020-nji ýylyň noýabr aýynda geçirilmelidi, ýöne koronawirus sebäpli yza süýşürildi.
BB-niň we HPG-niň assambleýalarynda adatça maliýe we ösüş ministrleri, merkezi banklaryň ýolbaşçylary, hususy pudagyň liderleri, raýat jemgyýetiniň we ylmy toparlaryň, köpçülikleýin habar beriş serişdeleriniň wekilleri gatnaşýar. Onda ykdysady perspektiwalar, global maliýe durnuklylygy, garyplygy ýok etmek, inklýuziw ykdysady ösüş, iş orunlaryny döretmek we howanyň üýtgemegi ýaly global meseleler ara alnyp maslahatlaşylýar.