Gonkongyň Cathay Pacific awiakompaniýasy Russiýanyň howa giňişliginden aýlanyp geçip, Nýu-Ýork – Gonkong ugry boýunça gonuşsyz uçuşlary amala aşyrmagy meýilleşdirýär. Bu hem dünýädäki iň uzyn awiaugur bolar. Bu barada awiakompaniýanyň resminamalaryna salgylanyp, Bloomberg agentligi habar berýär. Muny TASS ýetirýär.
Adatça, Cathay Pacific uçarlary Russiýanyň howa giňişligine girip, Arktikanyň üsti bilen uçýardylar. Ýöne Russiýa garşy günbatar sanksiýalary sebäpli Aziýa ýurtlarynyň birnäçe awiakompaniýasy Russiýanyň çäginden uçmakdan saklanýarlar.
Nýu-Ýorkdan Gonkonga uçulanda Cathay Pacific laýnerleri, takmynan, 17 sagadyň dowamynda 16 618 km aralygy geçerler. Häzirki wagtda Singapurdan Nýu-Ýorka gonuşsyz uçuş (15 349 km) uzynlygy boýunça rekordly ugur hasaplanýar diýip, Bloomberg belleýär.
Cathay Pacific-iň wekili bu ugurda Airbus A-350-1000 awialaýnerleriniň ulanyljakdygyny habar berdi.
