Milli aeronawtika we kosmos giňişligini öwrenmek boýunça edara (NASA) 2027-nji ýylda kosmosdan tropiki tupanlary we gök gümmürdilerini öwrenmek üçin üç hemrany uçurmagy maksat edinýär. Bu barada edaranyň müdiri Bill Nelson NASA-nyň Merilend ştatynyň Grinbelt şäherindäki Goddard adyndaky kosmos uçuşlary merkezinde eden çykyşynda aýtdy diýip, TASS habar berýär.
“Men NASA-nyň täze geoylmy missiýasy barada habar bermäge şat” – diýip, ol aýtdy. Nelson taslamanyň INCUS (Investigation of Convective Updrafts) adyny alandygyny belledi.
“Bu üç sany kiçi hemra bolar. Olaryň 2027-nji ýylda uçurylmagyna garaşylýar. Olar tropiki tupanlaryň we gök gümmürdileriniň özüni alyp barşyny, şeýle-de olaryň howa we klimat modellerine täsirini öwrener” – diýip, NASA-nyň ýolbaşçysy belledi.
Onuň aýtmagyna görä, NASA-nyň şeýle kosmos taslamalary Ýerdäki dürli tebigy betbagtçylyklara taýýarlygy güýçlendirmäge mümkinçilik berer.
