«Maklareniň» sürüjisi Rikkýardo Italiýanyň Gran-prisiniň ýeňijisi boldy

«Maklareniň» sürüjisi Rikkýardo Italiýanyň Gran-prisiniň ýeňijisi boldy

«Maklaren» toparynyň awstraliýaly sürüjisi Daniel Rikkýardo Formula-1 ulag klasyndaky awtoýaryşlar boýunça dünýä çempionatynyň 14-nji tapgyry bolan Italiýanyň Gran-prisiniň esasy ýaryşynda ýeňiji boldy.

Ýaryşda ikinji orny Rikkýardonyň topardaşy britaniýaly Lando Norris eýeledi, üçünji bolup pellehana “Red Bulldan” meksikaly Serhio Peres geldi, ýöne onuň wagtyna bäş jerime sekunty goşuldy, şondan soň bu orun pelotonyň ahyryndan ugran we şenbe güni sprint ýaryşynda ýeňiji bolan “Mersedesden” Waltteri Bottasa geçdi.

Rikkýardo karýerasynda sekizinji we 2018-nji ýyldan bäri ilkinji ýeňşini gazandy. Şol wagt ol “Red Bulluň” düzüminde çykyş edýärdi. 26-njy aýlawda çempionatyň liderleri Maks Werstappen (“Red Bull”) bilen britaniýaly Lýuis Hemilton (“Mersedes”) biri-biri bilen çaknyşyp, distansiýadan çykdylar. 

Umumy sanawda 226,5 utuk gazanyp Werstappen öňde barýar, ikinji orny Hemilton (221,5), üçünji orny Bottas (141) eýeleýär. Konstruktorlaryň kubogynda “Mersedes” (362,5) öňde barýar, ikinji orunda “Red Bull” (344,5), üçünji orunda “Maklaren” (215) ýerleşýär.
Formula-1-iň indiki tapgyry 24 – 26-njy sentýabrda Russiýada geçiriler.