Wengriýanyň wekili Kriştof Milak 200 metr aralyga batterflýaý usulynda ýüzmekde Tokioda dowam edýän Olimpiýa oýunlarynyň altyn medalyny gazandy. Ýeňiji bu aralygy 1 minut 51,25 sekuntda geçip, täze Olimpiýa rekordyny goýdy. Ikinji orny ýaponiýaly Tomoru Honda (+2,48), üçünji orny italiýaly Federiko Burdisso (+3,20) eýeledi.
Mundan öňki Olimpiýa rekordy amerikaly Maýkl Felpse degişlidi (1.52,03), ol bu rekordy 2008-nji ýylda Pekindäki Olimpiýa oýunlarynda goýdy. Felps – Olimpiýa oýunlarynyň taryhynda iň köp baýrakly türgen, onuň hasabynda 23 altyn, üç kümüş we iki bürünç medal bar.
Milak 21 ýaşynda, bu baýrak onuň üçin Olimpiýa oýunlarynda ilkinji boldy. Türgene bu aralyga ýüzmekde dünýä rekordy (1.50,73) degişlidir.
Awstraliýanyň wekili Ariarne Titmus bolsa 200 metr aralyga erkin usulda ýüzmekde Oýunlaryň altyn medalyny gazandy. Ýeňiji 1 minut 53,50 sekunt netijäni görkezip, täze Olimpiýa rekordyny goýdy. Mundan öňki rekord 2012-nji ýylda Londondaky Olimpiýa oýunlarynda amerikaly Ellison Şmit (1 minut 53,51 sekunt) tarapyndan goýuldy.
Ikinji orny Gonkongyň wekili Şiwon Bernadett Houi, üçünji orny kanadaly Penni Oleksýak eýeledi.