Jeff Bezos dogany bilen bilelikde kosmosa uçar

Jeff Bezos dogany bilen bilelikde kosmosa uçar

Amazon kompaniýasynyň baş direktory Jeff Bezos 20-nji iýulda dogany bilen bilelikde kosmosa uçýandygyny aýtdy diýip, TASS habar berýär.

“Men bäş ýaşymdan bäri kosmosa uçmagy arzuw edýärdim. 20-nji iýulda men bu syýahaty doganym bilen bile amala aşyraryn” – diýip, ol özüniň Instagram sahypasynda ýazdy.
Bu posta goşulan wideorolikde milliarder uçuşa gatnaşmak kararyna gelendigini, sebäbi muny ömürboýy isländigini düşündirdi. “Bu tejribe seni, seniň bu planeta, adamzada bolan garaýşyňy üýtgedýär” – diýip, Bezos belledi.

Bezosa degişli bolan Blue Origin kompaniýasy 20-nji iýulda New Shepard gämisinde ilkinji gezek suborbital uçuşa ýolagçy iberer. 5-nji maýda kompaniýa kosmosyň çägine uçuş üçin ilkinji petegiň üç tapgyrda geçip, 12-nji iýunda tamamlanjak auksion arkaly satyljakdygyny habar berdi.
New Shepard alty adamy ýa-da ýük göterip bilýär. Kosmosyň çägine ýetilenden soň, syýahatçylar howpsuzlyk kemerlerini açyp, dört minut töweregi agramsyzlyk ýagdaýynda bolmaly bolarlar, şondan soň olar bilen kapsula aşak düşüp, paraşýutlarda ýuwaşlyk bilen gonmaga başlar.
Blue Origin kosmosa yzygiderli syýahat uçuşlaryny gurnamaga synanyşyk edýän firmalaryň biridir. Virgin Galactic we SpaceX kompaniýalarynyň hem şeýle meýilnamalary bar.