COVID-19 Ewereste baryp ýetdi

COVID-19 Ewereste baryp ýetdi

Koronawirus dünýäniň iň beýik dag depesi bolan Ewereste hem baryp ýetdi. Dag bir ýyldan gowrak wagt bäri ýapyk bolup, daga çykmak möwsümi ýaňy-ýakynda açyldy.

BBC rus gullugy alpinistleriň biriniň, ýagny norwegiýaly Erlend Nessiň 15-nji aprelde alyp gaýtmak üçin dikuçar çagyrylýança, alty günläp dagda özüni erbet duýandygyny ýazýar. Ol hassahana äkidildi, netijede onda COVID-19 ýüze çykaryldy. Häzir Nessiň sagalandygy we Nepalyň paýtagty Katmanduda dostlarynyň ýanynda bolýandygy habar berilýär. Muny Day.Az ýetirýär.
Ness Nepalyň Gimalaý daglaryndaky Khumbu jülgesindäki adaty çaýhanalaryň birinde keselläp bilendigini çaklaýar. Onuň aýtmagyna görä, ýolda hiç kim diýen ýaly – alpinistler hem, ýerli ýaşaýjylar hem örtük dakynmaýarlar.
Soňrak bu kesel norwegiýalynyň toparyna ýoldaş bolan ýerli ugradyjylaryň birinde ýüze çykaryldy. Ewerest dagyna çykmagyň başlangyç tapgyrynda käbir alpinistlere ýolbelet hökmünde şerpler – ýerli halkyň wekilleri ýoldaş bolýarlar.
Nepal üçin bu diýseň oňaýsyz ýagdaý. Ýurt Ewerest dagynda alpinizmden gelýän girdejä (ýylda, takmynan, 4 mln dollar) bagly bolýar, möwsüm bolsa açylyp ýetişmänkä, howp astyna galdy.