«Formula-1-iň» ýedi gezek çempiony, «Mersedes» toparynyň sürüjisi Lýuis Hemilton «Patyşalyk ýaryşlarynda» lideriň ornunda aýlaw sany boýunça ýedi gezek dünýä çempiony Şumaheriň rekordyny täzeledi diýip, rsport.ria.ru habar berýär.
Hemilton ýekşenbe güni Bahreýnde geçirilen 2021-möwsüminiň birinji tapgyrynda ýeňiji boldy. «Formula-1-iň» resmi saýtynyň habar bermegine görä, ýaryşyň dowamynda 36 ýaşly Hemilton Şumaheriň gazanan üstünliklerini kesip, liderligiň 5111 aýlaw belliginden geçdi. Ýeňişden soň Hemiltonyň liderlik eden aýlawlarynyň sany 5126-a ýetdi.
Hemilton öň hem Şumaheriň goýan birnäçe rekordyny, şol sanda karýerasynyň dowamynda gazanan ýeňişleriniň we eýelän poul-pozişnleriniň sany boýunça rekordy täzelemegi başardy.
Belläp geçsek, birinji tapgyrda ikinji orny +0,745 sekunt netije bilen «Red Bulldan» Maks Ferstappen eýeledi. Üçünji bolup iň gowy aýlawyň awtory bolan +37,383 sekunt netije bilen «Mersedesiň» sürüjisi Waltteri Bottas geldi.
«Formula-1-iň» indiki tapgyry 16-18-nji aprelde Imolada (Italiýa) Enso we Dino Ferrari awtodromynda geçiriler.