2021-nji ýylyň 20-nji fewralynda Russiýanyň Ylymlar akademiýasynyň Çumakow merkezi tarapyndan işlenip taýýarlanylan koronawirus ýokanjyna garşy "KowiWak” sanjym serişdesini bellige almaklyk meýilleşdirilýär diýip, pnp.ru habar berýär.
“KowiWak” serişdesi – diňe hasap boýunça “Sputnik V-den” we EpiWakKoronadan” soň üçünji bolman, eýsem, görnüşi boýunça-da üçünjidir. Ol jansyzlandyrylan (“öldürilen”) koronawirusyň esasynda taýýarlanyldy. Sanjym edilende organizm wirusyň antigen düzümini tapýar, ony ýatda saklaýar we geljekde onuň ähli ýüze çykmalaryna taýýar bolýar.
Russiýanyň Saglygy goraýyş ministrligi 25-nji sentýabrda “KowiWak” sanjymynyň kliniki synaglaryna rugsat berdi. Synaglaryň birinji tapgyrynda 200 meýletinçä sanjym edildi. Sanjymdan soň meýletinçilerde ýaramaz ýagdaýlar ýüze çykarylmady.
Dekabr aýyndan bäri Sankt-Peterburgda, Nowosibirskde we Kirowda 200 meýletinçiniň gatnaşmagynda geçýän ikinji tapgyrda bu derman serişdesiniň täsirliligini subut etmek göz öňünde tutulýar. Ikinji tapgyr synaglary tamamlanandan soň, sanjym üç müň meýletinçide synagdan geçirilip başlanar.
