Germaniýanyň çempionatynyň 17-nji tapgyrynyň çäginde "Bawariýa" myhmançylykda "Augsburg" bilen duşuşdy. Oýun Hans-Diter Flikiň şägirtleriniň 1:0 hasabyndaky ýeňşi bilen tamamlandy.
OptaFranz-yň "Twitter"-de belleýşi ýaly, 34 ýaşly derwezeban Manuel Noýer Germaniýanyň çempionatynda gol geçirtmedik oýunlarynyň sanyny 196-a ýetirdi. Şeýlelikde, ol mýunhenli toparyň rowaýaty derwezebany Oliwer Kanyň üstünligini gaýtalady.
Soňky ýeňşinden soň “Bawariýa” 39 utuk toplap, Germaniýanyň çempionatynyň 2020/2021 möwsüminde birinji ýerde durýar. "Augsburg" hem öz gezeginde 19 utuk bilen 12-nji ýerde ýerleşýär. Bäsleşigiň ilkinji üçlügine şu wagt "RB Leipzig" (35) we "Baýer" (32) girýär.
Bundesliganyň indiki tapgyrynda "Bawariýa" "Şalke-04" bilen duşuşar.
