Braziliýaly rowaýaty hüjümçi Pele özüniň resmi Instagram sahypasyndaky ýazgysyny üýtgetdi. Indi onuň profilinde hüjümçiniň karýerasynda 1283 pökgi geçirip, ähli döwürleriň iň köp pökgi geçiren oýunçysydygy görkezilýär. Bu barada championat.com habar berýär.
Peläniň şahsy hasabynda bu düzediş “Ýuwentusyň” hüjümçisi Kriştianu Ronaldunyň täze rekord goýandygy mälim edilenden soň girizildi. 4-nji ýanwarda Ronaldu A Seriýada “Udinezä” garşy oýunda 758-nji goluny tora girizdi. Karýerasyndaky gollaryň sany boýunça portugaliýaly oýunçy resmi sanlara görä 757 pökgi geçiren Peleden öňe geçdi.
Indi bolsa braziliýaly futbolçy Instagramda has köp gol salandygyny aýdýar.
Şuňa meňzeş wakanyň "Barselonanyň" kapitany Lionel Messiniň rekordyndan soň hem bolup geçendigini ýatladýarys. Ol "Barselonanyň" düzüminde 644 pökgi geçirip, Peläniň bir klubdaky gollar boýunça rekordyny täzeledi. Şondan soň Braziliýanyň "Santos" kluby Peläniň klub üçin 1091 pökgi geçirendigini habar berdi.
