2020-nji ýyldaky Klublaýyn dünýä çempionaty Katarda 2021-nji ýylyň 1 – 11-nji fewral aralygynda 2022-nji ýyldaky dünýä çempionatynyň stadionlarynda geçiriler. COVID-19 pandemiýasy sebäpli ilkibaşda şu ýylyň dekabr aýyna meýilleşdirilen ýaryş has yza süýşürildi. Bu barada russian.rt.com habar berýär.
Baýrak üçin alty kontinental konfederasiýanyň ýeňijileri, şeýle-de ýaryşy gurnaýan ýurduň, ýagny Kataryň çempiony bäsleşer. Oýunlar futbol üçin doly taýýarlanan DÇ-2022-niň üç meýdançasynda – “Ahmad bin Ali”, “Edýukeýşn Siti” we “Halkara Halifa stadionynda” geçiriler.
Kataryň çempiony “Al-Duhail” bilen Täze Zelandiýanyň “Oklend Siti” klubynyň arasyndaky açylyş oýny 1-nji fewralda “Ahmad bin Ali” stadionynda bolar. Final 11-nji fewralda “Edýukeýşn Siti” stadionynda geçiriler.
Ýaryşa Çempionlar ligasynyň ýeňijisi Mýunheniň “Bawariýasy”, KONKAKAF çempiony bolan meksikan kluby “Tigres UANL”, Afrika kontinentiniň çempiony bolan Müsüriň “Al-Ahli” kluby, şeýle-de Aziýanyň çempionlar ligasynyň ýeňijisi Günorta Koreýadan “Ulsan Hýonde” gatnaşar.
Günorta Amerikanyň wekili 2021-nji ýylyň ýanwar aýynyň ahyrynda Liber-tadores kubogynyň finalynda kesgitlener. Toparlaryň final jübütlerini düzjek ýaryşyň bije atyşygy 2021-nji ýylyň 19-njy ýanwarynda Sýurihde geçiriler.
