"Bawariýa" we "Mançester Siti" ÇL-iň pleý-off tapgyryna çykdylar

"Bawariýa" we "Mançester Siti" ÇL-iň pleý-off tapgyryna çykdylar

Çarşenbe güni geçirilen oýunlardan soň, "Bawariýa" hem-de "Mançester Siti" möhletinden öň UEFA-nyň Çempionlar ligasynyň 1/8 finalyna gatnaşmaga hukuk gazandylar.

"Bawariýa" ýokary derejeli oýun görkezip, "Zalzburgy" 3-1 hasabynda ýeňdi hem-de "A" toparçada birinji ýeri eýeledi.
Toparçanyň beýleki iki topary Madridiň "Atletikosy" bilen Moskwanyň "Lokomotiwiniň" arasyndaky oýunda hasap açylmady. 0:0 hasabynda tamamlanan oýunda rus toparynyň 34 ýaşly derwezebany Gulýerme ýekeje pökgi hem geçirmän, aýratyn tapawutlandy.
Madridiň "Realy" 0:2 hasabynda milanly "Interi" ýeňip, "B" toparçada ikinji ýeri eýeledi. Oýnuň 33-nji minudynda Arturo Widal emin bilen jedelleşendigi üçin ikinji sary duýduryş belgisini alandan soň italýan kluby on adam bilen galdy.
Mönhengladbahly "Borussiýa" "Şahtýory" ýene 4:0 hasabynda ýeňip, toparçada birinji ýeri eýeledi. "Borussiýanyň" oýunçysy Brel Embolo üstaşyr depip, tapgyryň iň owadan pökgüsini tora girizdi.
“C” toparçada “Mançester Siti” “Olimpiakosy” ýeňip, möhletinden öň pleý-off tapgyryna çykmagy başardy. Oýnuň ýeke-täk pökgüsini Fil Foden tora girizdi.
Bu toparçadaky beýleki oýunda marselli “Olimpik” "Portodan" 0:2 hasabynda asgyn geldi. Şeýlelikde, "Olimpik" Çempionlar ligasynyň 13 oýnunda yzly-yzyna utulyp, antirekord goýdy. Andre Willaş-Boaşyň topary ýaryşda henize çenli ýekeje gol hem geçirip bilmedi.
“D” toparçada “Aýaks” indi öňdebaryjy "Liwerpuldan" iki utuk uzakda. Gollandiýaly klub Daniýanyň çempiony “Mitýullandy” 3:1 hasabynda ýeňdi.
Öň ýeňlişsiz barýan “Liwerpul” öz öýünde “Atalantadan” 0:2 hasabynda utuldy. Ýurgen Klopp topary oýna synag düzümi bilen çykardy. Tutuş oýun boýunça “gyzyllar” derwezä tarap ýekeje-de zarba urup bilmediler we möhletinden öň 1/8 finala çykmak mümkinçiligini elden gidirdiler.
Bu toparçalardaky indiki oýunlar 1-nji dekabrda geçiriler.