Hytaý koronawirusa garşy sanjymlara deň elýeterliligi üpjün edýän COVAX halkara mehanizmine resmi taýdan goşuldy. Bu barada Hytaýyň Daşary işler ministrliginiň resmi wekili Hua Çunin habar berdi. Muny rg.ru ýetirýär.
8-nji oktýabrda Hytaý bilen Gavi global birleşigi COVAX-a resmi taýdan goşulmak barada şertnama baglaşdy.
Çuniniň aýtmagyna görä, Hytaý özüniň wadasynda durmak hem-de COVID-19-a garşy sanjymy “dünýä jemgyýetçiliginiň peýdasyna” öwürmek üçin bu möhüm ädimi ätdi. Çunin Hytaýyň COVAX arkaly ýurtlar bilen sanjym pudagyndaky hyzmatdaşlygy güýçlendirjekdigini, şeýle-de pandemiýa bilen göreşe özüniň goşandyny goşmak üçin mehanizme gatnaşyjylaryň ählisi bilen özara gatnaşygy ösdürjekdigini belledi.
COVAX mehanizmine eýýäm dünýäniň 170 ýurdy goşuldy. Bu mehanizm ähli ýurtlar üçin täsirli sanjymyň gözlegini çaltlaşdyrmagy maksat edinýär. Ol önümçilik desgalarynyň döredilmegini we 2021-nji ýylyň ahyryna çenli iki milliard töweregi doza sanjymy deň paýlamak üçin satyn alyş işlerini hem goldaýar. Derman serişdelerini 92 sany maliýeleşdiriji ýurt töleýär.
Mundan ozal, Bütindünýä saglygy goraýyş guramasynyň baş müdiri Tedros Adhanom Gebreýesus ähli ýurtlary COVAX mehanizmine goşulmaga çagyrdy, bu mehanizm arkaly ähli ýurtlar synag tamamlanandan soň, koronawirusa garşy sanjym bilen üpjün edilmeli.