Aziýa Ösüş Banky (AÖB) Özbegistandaky Surhan podstansiýasyndan Owganystandaky Hwaja-Alwan podstansiýasyna çenli 500 kW elektrik geçiriji liniýasyny gurmak üçin 110 million dollarlyk granty tassyklady, bu bolsa Owganystanyň Merkezi Aziýadan elektrik energiýasynyň importyny iki esse artdyrar diýip, ORIENT habar berýär.
AÖB-iň habarynda bellenilişi ýaly, elektrik geçiriji liniýanyň uzynlygy 201 km bolar. Hwaja-Alwan podstansiýasy Täjigistandan, Türkmenistandan we Özbegistandan elektrik üpjünçiligi üçin esasy merkezdir.
Taslama iki ýurduň hökümetleri tarapyndan 2020-nji ýylyň awgust aýynda gol çekilen 10 ýyllyk şertnama laýyklykda, Özbegistanyň we Owganystanyň energiýa ulgamlarynyň arasynda elektrik akymyny üpjün eder. Taslamanyň tamamlanmagy Owganystandaky 500 müň sarp edijini elektrik toruna birikdirmäge mümkinçilik berer.
“Owganystanda elektrik energiýasyna bolan isleg çalt ösýär we bu ýurduň ykdysady ösüşi üçin möhümdir. Taslama ulgamy ösdürmek we 3 TWt energiýa importy bilen bir ýylda 900 MWt elektrik energiýasyny import etmek mümkinçiligini artdyrmak arkaly öý hojalygyna we kärhanalara ygtybarly hem-de elýeterli elektrik üpjünçiligini ýola goýmaga kömek eder"- diýlip, habarda AÖB-iň energetika boýunça hünärmeni Nana Gurgenidzäniň sözleri getirilýär.
Häzirki wagtda Owganystanda ilatyň diňe 34% -i elektrik togundan peýdalanýar.
Aziýa 2002-nji ýyldan bäri 1,77 milliard dollarlyk umumy borçnamalary (grant görnüşinde) bilen energiýa pudagyny ösdürmekde Owganystanyň iň uly hyzmatdaşlaryndan biridir.
