Sekiz gezek olimpiýa çempiony Useýn Bolt täze görnüşli koronawirus bilen keselledi. Bu barada Ýamaýkanyň Saglygy goraýyş ministrliginiň metbugat gullugyna salgylanyp, regnum.ru habar berýär.
Edaranyň maglumatlary boýunça, meşhur türgeniň koronawirus üçin barlagy položitel netijäni berdi. Häzir Bolt aýry saklanylýar. Türgeniň saglyk ýagdaýy barada başga maglumatlar habar berlenok.
Ýatlap geçsek, ýeňil atletikaçy Useýn Bolt heniz hem taryhda iň çalasyn adam titulyny saklaýar. Ol 2009-njy ýylda 100 metr aralykda 9,58 sekunt bilen dünýä rekordyny goýdy, bu rekord häzire çenli täzelenenok.
21-nji awgustda Bolt köp sanly belli türgenleriň kampaniýasynda 34 ýaşyny belledi. Oturylyşyk agşamyna “Mançester Sitiniň” hüjümçisi Rahim Sterling, “Baýeriň” hüjümçisi Leon Beýli, kriket oýunçysy Kris Geýl, şeýle-de ýamaýkaly reggi-ýerine ýetirijisi Kristofer Martin çagyryldy. Boltuň oturylyşyk agşamyny geçireninden soň, COVID-19 üçin položitel netijäni berendigi bellenilýär.
Bolt sport karýerasyny 2017-nji ýylda tamamlady.
