Lissabonda Molekulýar lukmançylyk instituty koronawirusy bitaraplaşdyrmaga ukyply bolan ilkinji gorag örtügini taýýarlandygyny mälim etdi. Bu barada “La Razon” gazetine salgylanyp, ТАSS ýetirýär.
Onuň maglumatlary boýunça, gürrüň ýokary täsirli köp gezeklik örtük barada gidýär. Institutda gorag serişdesiniň birnäçe dürli suw geçirmeýän gatdan ybarat bolan ýörite matanyň ulanylmagy bilen taýýarlanylandygy anyklaşdyryldy. Geçirilen synaglar önümiň koronawirus ýokanjyndan goranmakda täsirlidigini tassyklady.
“Maska SARS-CoV-2 wirusy mata bilen aragatnaşyga giren ýagdaýynda, ony bitaraplaşdyrýan innowasion örtüge eýe. Onuň täsirliligi mata 50 gezek ýuwlanda hem saklanýar” – diýip, institutda belleýärler.Portugaliýada koronawirus ýaýrap başlanyndan bäri 50 müň kesel ýagdaýy ýüze çykaryldy, 1 712 syrkaw ýogaldy. 35 müň töweregi adam sagaldy.
Öň, Nýu-Ýorkda Kolumbiýa uniwersitetiniň alymlarynyň koronawirusy bitaraplaşdyrmaga kömek etjek antibedenjiklerden garyndy taýýarlandyklary habar berildi.
