«Real Madridiň» hüjümçisi Kilian Mbappe 27 ýaşynda Madridde sürüjilik şahadatnamasyny aldy. Ol özüniň ilkinji ulagy hökmünde awtomat korobkaly doly elektrikleşdirilen «BMW iX3» modelini saýlady.
BMW kompaniýasy Madrid klubunyň hyzmatdaşy bolsa-da, toparyň beýleki oýunçylarynyň arasynda bu modeli Mbappeden başga saýlan ýok.
Mbappeniň täze awtomobilini sürüp, klubyň binasyna gelmegi janköýerleriň we žurnalistleriň arasynda şowhun döretdi. Olar furbolçyny sürüjilik şahadatnamasyny almagy bilen gutladylar. 27 ýaşynda ilkinji gezek özbaşdak ulag sürüp başlan fransuz hüjümçisi bilen bolan bu täzelik metbugatda hem giňden seslenme tapdy. Mundan ozal «Real Madridiň» ýyldyzy diňe şahsy sürüjisiniň hyzmatyndan peýdalanyp gelýärdi.
Şol bir wagtda futbolçynyň öz kakasy Wilfridiň watany bolan Kamerunyň Bonaberi obasyndaky mekdebiň abatlaýyş işlerini maliýeleşdirendigi barada hem habar berildi. Mbappeniň bölüp beren serişdeleriniň hasabyna mekdebiň daşky görnüşi we synp otaglary täzelendi, şeýle hem okuwçylaryň futbol we basketbol oýnamagy üçin täze sport meýdançasy guruldy. Fransuz hüjümçisi bu habar barada beren teswirinde özüniň afrikan däp-dessurlaryna berk baglydygyny we maşgalasy bilen baglanyşykly jemgyýetlere goldaw bermek isleýändigini aýratyn nygtady.
2024-nji ýylda «Real Madride» geçen Mbappeniň bu asylly ädimi sport hem-de ynsanperwerlik dünýäsinde uly gyzyklanma döretdi.
