1500 at güýjüne eýe bolan Bugatti Chiron giperkary drag-reýsingde garaşylmadyk ýagdaýda 1250 at güýji hem-de Bugatti-den 17 esse arzan bolan Chevrolet Corvette ZR1X ulagyndan ýeňildi.
Çärýek mil aralygyna guralan bu bäsleşik "Drag Times" YouTube kanaly tarapyndan geçirildi. Bu ýaryş has elýeterli amerikan modeliniň dinamika boýunça ykrar edilen liderden üstün çykandygyny görkezdi.
Dört tekeri hem hereketli Bugatti Chiron dört turbinaly 8 litrlik W16 hereketlendirijisi bilen üpjün edilip, onuň agramy 1950 kilograma barabardyr. Öz gezeginde, Chevrolet Corvette ZR1X goşa turbo üfleýjili 5,5 litrlik V8 hereketlendirijisi we goşmaça elektrik hereketlendirijisi bilen enjamlaşdyrylyp, onuň umumy agramy bäsdeşinden takmynan 100 kilogram ýeňildir.
Chevrolet-iň transmissiýasynyň özboluşly aýratynlygy, 250 km/sag tizliginden geçilende elektrik hereketlendirijisiniň öçmegidir, şondan soň awtoulag diňe yzky tekerler arkaly işleýär. Duran ýerinden başlamak bilen guralan iki ýaryşda hem Chevrolet Corvette ZR1X ynamly ýeňiş gazanyp, ýoluň ahyrynda bäsdeşinden birnäçe korpus öňe saýlandy.
Hereket edip barýarka başlangyç ýaryşda amerikan superkarynyň sürüjisi robotlaşdyrylan gutuda tizlik saýlamada säwlik goýberip ýeňlen hem bolsa, gaýtadan guralan ýaryş Corvette-iň üstünligini ýene-de tassyklady.
Ýaryşy gurnaýjylar bu duşuşygyň maliýe tarapyna-da ünsi çekdiler. Bugatti Chiron-yň bahasy takmynan 4 million dollara barabar bolsa, iň ýokary derejeli Chevrolet Corvette ZR1X-i bary-ýogy 231 müň dollara satyn alyp bolýar.
