Üç günläp dowam edýän Gurban baýramy türkmen paýtagty Aşgabat şäherinde hem-de ýurduň ähli welaýatlarynda giňden bellenilýär.
Türkmenistanyň Prezidenti Serdar Berdimuhamedow türkmen halkyny ynsanperwerligiň, dostlugyň we parahatçylyk söýüjiligiň ýörelgelerini berkitmäge hyzmat edýän, türkmen halkynyň ruhy we ahlak gymmatlyklaryny, şeýle hem jemgyýetde agzybirligi, özara hormat goýmagy we ruhy bitewüligi özünde jemleýän Gurban baýramy bilen tüýs ýürekden gutlady.
“Ynsanyýetiň ählumumy medeni mirasynyň gymmatly bölegine öwrülen Gurban baýramy türkmen halkynyň baý ruhy dünýäsiniň, köpasyrlyk däp-dessurlarynyň we ynanç-ygtykatlarynyň belent dabaralanmasydyr. Ynsanperwerlik, dostluk, parahatçylyk söýüjilik ýörelgelerini rowaçlandyrýan bu mukaddes baýram halkymyzyň ruhy-ahlak gymmatlyklaryny özünde jemleýär hem-de jemgyýetimizde agzybirligi, özara hormat-sylagy, ruhy bitewüligi has-da pugtalandyrýar” diýip, gutlagda beýan edilýär.
Baýramçylyk günlerinde ýurduň ähli künjeklerinde aýdym-sazly dabaralar we medeni çäreler geçirilýär. Her bir maşgala Gurban baýramy mynasybetli sadaka berýär we ýurduň parahatçylygy, abadançylygy hem-de rowaçlygy üçin doga-dilegler edýär.
Döwlet Baştutany türkmen halkynyň milli baýramy bolan Gurban baýramyny şu ýylyň 27-28-29-njy maýynda bellemek hakyndaky Permana gol çekipdi.
