La Liga indiki möwsümden başlap, eminleriň işine baha bermek we oýunlara eminleri saýlap almak üçin emeli aň ulgamyny ornaşdyrmagy meýilleşdirýär. Bu barada Madridde geçirilen ISDE Sports Convention 2026 maslahatynda liganyň prezidenti Hawýer Tebas mälim etdi. Onuň sözlerini «Marca» neşiri getirýär.
Onuň aýtmagyna görä, emeli aň eminler toparynyň işine baha bermekde ulanylýan parametrleriň azyndan 40%-ini obýektiw seljermäge mümkinçilik berer. Häzirki wagtda 30-a golaý kriteriýa Eminleriň tehniki komitetiniň işgärleri tarapyndan elde seljerilip baha berilýär.
«Biz emeli aňyň kömegi bilen parametrleriň azyndan 40%-ini obýektiw kesgitlejek guraly döredýäris. Ähli geçirilen oýunlaryň esasynda ýörite ulgam döredilýär we algoritmler emele getirilýär. Emeli aň hemme zady seljerer we eminiň nirede dogry çözgüt berendigini görkezer. Biz bu işi has obýektiw ýagdaýa getirýäris» – diýip, Tebas belledi.
Täze ulgam eminleri duşuşyklara bellemek işine hem gatnaşar. Emeli aň komitete anyk bir oýun üçin iki ýa-da üç sany dalaşgäri hödürlär, ýöne soňky gutarnykly çözgüt ýene-de adamyň özüne galar.
«Marca-nyň» berýän maglumatyna görä, La Liga we Patyşalyk ispan futbol federasiýasy birnäçe aýdan bäri bu ulgamy ornaşdyrmagyň üstünde işleýär. Baha bermegiň mümkin bolan kriteriýalarynyň arasynda eminiň anyk bir toparlar bilen geçiren oýunlarynyň sany, şol duşuşyklaryň netijeleri we emin bilen klublaryň arasynda ozal ýüze çykan düşünişmezlikleriň barlygy ýaly ýagdaýlar göz öňünde tutulýar.
