2026-njy ýylyň 9-17-nji maýy aralygynda Hindistanyň Gandinagar şäherinde geçirilen agyr atletika boýunça Aziýa çempionatynda Türkmenistanyň ýygyndy topary üstünlikli çykyş etdi. Türkmen türgenleri bu abraýly yklym ýaryşynda ýokary ussatlyk görkezip, bir kümüş we dört bürünç medala mynasyp boldy.
Dartgynly geçen bäsleşiklerde Döwranbek Hasanbaýew silterläp götermekde 188 kg netije görkezip, iki görnüşiň jemi boýunça 392 kg agramy aldy. Netijede, ol umumy görkeziji boýunça kümüş medala we silterläp götermekde bürünç medala mynasyp boldy.
Toparyň beýleki bir agzasy Rüstem Annaberdiýew bolsa silterläp götermekde 158 kg we itekläp götermekde 196 kg görkezip, jemi 354 kg agramyň hötdesinden geldi. Ol umumy netije boýunça üçünji orny eýeledi, şeýle-de silterläp götermek boýunça bürünç medala mynasyp boldy.
Bunýad Raşidow silterläp götermekde 147 kg netije görkezip, bürünç medalyň eýesi boldy. Türgen itekläp götermekde 165 kg galdyryp, iki görnüşiň jemi boýunça 312 kg aldy.
Aziýa çempionaty yklymyň iň güýçli agyr atletikaçylaryny bir ýere ýygnady. Birnäçe ugurlar boýunça Hytaýyň, Özbegistanyň, Eýranyň, Günorta Koreýanyň, KHDR-iň, Hindistanyň we Taýwanyň wekilleri ýeňijiler we baýrakly orunlaryň eýeleri boldy.
