Hindistanyň Gandinagar şäherinde başlan agyr atletika boýunça Aziýa çempionaty — 2026-da Türkmenistana alty sany türgen wekilçilik eder.
Yklym derejesindäki bu bäsleşige dünýäniň 28 ýurdundan 172 ştangaçy ýygnandy. Olar erkekleriň we aýallaryň arasynda sekiz agram derejesinde baýrakly orunlar ugrunda bäsleşer.
Türkmen ýygyndysynyň çykyşlarynyň tertibini eýýäm şu gün, ýagny 14-nji maýda Bunýad Raşidow (71 kg çenli) we Bektimur Reýimow (79 kg çenli) açar. Ertir bolsa 88 kg çenli agram derejesinde Ramazan Töräýew we Gaýgysyz Töräýew medallar ugrunda göreşer.
94 kg çenli agramda ýurdumyza Rüstem Annaberdiýew wekilçilik eder, milli ýygyndynyň çykyşlaryny bolsa 110 kg çenli agramda Döwranbek Hasanbaýew tamamlar.
Hindistan agyr atletika boýunça Aziýa çempionatyny 44 ýyllyk arakesmeden soň ikinji gezek kabul edýär — soňky gezek bu ýaryş 1982-nji ýylda Delide geçirilen IX Aziýa oýunlarynyň çäginde bolupdy.
Belläp geçsek, Hytaýyň Szýanşan şäherinde geçen ýyl geçirilen birinjilikde Türkmenistanyň ýygyndysy mynasyp netije görkezip, 6 sany medal (1 altyn, 1 kümüş we 4 bürünç) gazanypdy we umumy topar hasabynda dokuzynjy orny eýeledi. Bu üstünlige Döwranbek Hasanbaýew, Bunýad Raşidow, Bektimur Reýimow we Anamjan Rustamowa uly goşant goşdy.
