2026-njy ýylyň dünýä çempionatynyň öňüsyrasynda Argentinada kolleksiýa edilip ýygnalýan futbol ýelmentgilerine bolan isleg ýene-de ýokary galdy. Buenos-Aýresde müňlerçe janköýer Panini kompaniýasynyň täze albomy üçin suratlary çalşyrmak maksady bilen seýilgählere we meýdançalara ýygnanýarlar.
Kolleksiýaçylaryň esasy üýşýän ýerleriniň biri, edil öňkülerdäki ýaly, Riwadawiýa seýilgähi boldy. Ol ýere çagalar, ene-atalar we tejribeli janköýerler özlerindäki artykmaç suratlary çalşyrmak we toplumlaryny tamamlamak üçin gerek bolan ýelmentgileri tapmak üçin gelýärler.
Janköýerleriň arasynda aýratyn-da Lionel Messi, Kriştianu Ronaldu we Kilian Mbappeniň suratlary uly islegden peýdalanýar. Argentinaly janköýerleriň köpüsi geljekki dünýä çempionatynyň Messiniň karyerasyndaky iň soňky ýaryş boljakdygyna ynanýarlar.
2026-njy ýylyň turniri üçin Panini kompaniýasy öz taryhyndaky iň uly ýelmentgi toplumyny çykardy. Dünýä çempionatyna gatnaşýan ýygyndy toparlaryň sanynyň 32-den 48-e çenli köpeldilmegi sebäpli, albomdaky suratlaryň sany hem ep-esli artdy. Bu bolsa turnir başlanýança albomy doldurmak isleýän kolleksiýaçylaryň işini has-da kynlaşdyrdy.
