UEFA Çempionlar ligasynyň ýarym finalynyň jogap duşuşygynda «Pari Sen-Žermen» Mýunhende «Bawariýa» bilen 1:1 hasabynda deňme-deň oýnady. Iki oýnuň umumy netijesi boýunça 6:5 hasabynda öňe saýlanan parižliler turniriň finalyna ýollanma aldylar.
Eýýäm 3-nji minutda Hwiça Kwarasheliýanyň çep ganatdan beren netijeli pasyny Usman Dembele gol bilen jemledi we topy derwezäniň ýokarky söýesiniň aşagyndan tora gönükdirdi.
Gol goýberenden soň «Bawariýa» oýnuň ugruny üýtgetmäge çalyşdy. Jamal Musialanyň howply urgularyna parižlileriň derwezebany Matweý Safonow şowly gaýtargylar bilen jogap berdi. Beýleki tarapda bolsa Manuel Noýer Žoau Neweş, Dezire Due we Kwarasheliýanyň urgularyny yzyna serpikdirip, toparyny hasabyň ulalmagyndan halas etdi.
Duşuşygyň goşmaça berlen 4-nji minutynda Alfonso Dewisiň pasyndan soň Garri Keýn hasaby deňledi. Bu gol iňlis hüjümçisiniň turnirdäki 14-nji goly boldy, ýöne bu netije-de «Bawariýa» üçin ýeterlik bolmady.
PSŽ-niň goragçysy Willian Paço duşuşygyň iň gowy oýunçysy diýlip saýlandy.
PSŽ yzly-yzyna iki gezek finala çykan ilkinji fransuz kluby boldy. Şeýle-de parižlileriň «Real Madridden» soň öz çempionlyk titulyny gorap biljek ikinji topar bolmaga mümkinçiligi bar.
PSŽ-niň şu möwsümdäki gollarynyň sany 44-e ýetdi. Indi «Barselonanyň» 26 ýyl öň goýan möwsümleýin rekordyna ýetmek üçin topara ýekeje gol gerek.
Çempionlyk ugrundaky çözüji duşuşyk 30-njy maýda Wengriýanyň paýtagty Budapeştde geçiriler. Onda PSŽ we «Arsenal» (Madridiň «Atletikosyny» ýeňen) duşuşarlar. Oýun Aşgabat wagty bilen sagat 21:00-da başlar.
