Şu aýda «Christie’s» auksion öýi häzirki zaman sungat eserlerini satuwa çykarar, olaryň arasynda potolokdan asylyp goýlan pil hem bar.
Office Life neşiriniň habar bermegine görä, bu pil 2,5–3,5 million dollar aralygynda bahalanýar. Gürrüň adaty hojalyk guraly barada däl-de, eýsem meşhur fransuz-amerikan suratkeşi Marsel Dýuşanyň «Goluň döwülmeginiň öňüsyrasynda» atly heýkeli barada gidýär. Suratkeş adaty önümleri gurşawyň we garaýşyň üýtgemegi netijesinde sungat eserine öwürýän «redi-meýd» ugrunyň düýbüni tutujy hasaplanýar.
Bu iş ilkinji gezek 1915-nji ýylda döredildi. Bir çaklamada gürüň berilişine görä, suratkeş gezelenç edip ýörkä, bir dükanyň öňünde gyş harasatyndan öň satuwa çykarylan pilleri görýär. Olaryň birini satyn alyp, gol çekýär we ussahanasynda asyp goýýar. Auksionda bolsa eseriň has soňrak, ýagny 1964-nji ýylda döredilen nusgasy hödürlenýär.
Şeýle-de, söwdalarda Mark Şagalyň «Sirkdäki gyzyl şa gyzy» (1980) atly suraty hem satuwa çykaryldy we oňa 2–3 million dollar baha kesildi. Bu eserde suratkeşiň çagalykda Witebskide gören sergezdan artistleriniň çykyşlary baradaky ýatlamalary beýan edilýär. Kompozisiýanyň merkezinde gujaklaşyp duran keşpler suratkeşiň özüni we aýaly Bellany aňladýar.
Suratyň hakykylygy Şagal komiteti tarapyndan tassyklanyldy.
