Stokgolmyň ýaşaýyş nokatlarynyň birinde özboluşly kafe işläp başlady. Bu ýerde esasy dolandyryş çözgütleri Google Gemini-yň esasyndaky emeli aň tarapyndan kabul edilýär. San-Fransiskonyň Andon Labs startapy tarapyndan durmuşa geçirilen bu taslama biznesi hakyky şertlerde dolandyrmak boýunça synag hökmünde amala aşyryldy diýip, «Digital Journal» neşiri ýazýar.
Daşyndan seredeniňde, bu ýer adaty şäher kafelerinden dizaýny we menýusy bilen kän bir tapawutlanmaýar. Esasy tapawut dolandyryş ulgamyndadyr: bu ýerde menejeriň wezipesini sanly gurallar arkaly işgärler bilen aragatnaşyk saklaýan «Mona» atly emeli aň ýerine ýetirýär.
Ulgam menýuny düzmek, satyn almalary amala aşyrmak, işgärleri saýlap almak, ätiýaçlyklary dolandyrmak, guramaçylyk çözgütleri we esasy hasap-faktura işleri üçin jogap berýär. Taslama başlananda, işi gurnamak üçin oňa başlangyç býujet we degişli otag berildi.
Emeli aňyň dolandyrýandygyna garamazdan, kafe işgärleriň gatnaşmagynda işleýär. Ulgam tarapyndan işe alnan baristalaryň biri algoritmiň käwagt satyn almalarda ýalňyşlyk goýberip, gereginden artyk haryt sargyt edýändigini belleýär.
Müşderiler sargytlaryny hem işgärler, hem-de gönüden-göni ulgam arkaly berip bilýär. Munuň üçin kafede maliýe görkezijilerini hakyky wagtda görkezýän ekran we emeli aň bilen habarlaşmak üçin aragatnaşyk kanaly ýerleşdirildi.
Işläp düzüjileriň aýtmagyna görä, taslamanyň maksady emeli aňyň biznesi dolandyrmakdaky mümkinçiliklerini we çäklendirmelerini, şeýle hem ony ulanmagyň etiki taraplaryny öwrenmekden ybarat.
Häzirki wagtda kafe günde ortaça 50–80 adamy kabul edýär, olaryň agramly bölegi bu täze formatyň işleýşi bilen gyzyklanyp gelýär.
