Italýan tennisçisi Ýannik Sinner Madridde geçirilýän ATP «Masters» ýaryşynyň finalyna çykdy we bu kategoriýadaky ähli ýaryşlaryň finalyna ýetmegiň tizligi boýunça rekord goýdy.
Ýarym finalda Sinner fransuz tennisçisi Artýur Fisi 6:2, 6:4 hasaby bilen utdy. Bu ýeňiş onuň «Masters» ýaryşlarynda yzygiderli 27-nji ýeňşi boldy. Şu möwsümde italýan türgeni eýýäm bu seriýanyň üç ýaryşynda — Indian-Uellsde, Maýamide we Monte-Karloda ýeňiji boldy.
«Opta-nyň» maglumatlaryna görä, Sinner Rafael Nadaldan, Rojer Federerden we Nowak Jokowiçden soň, dokuz sany «Masters» ýaryşynyň ählisiniň finalyna çykan dördünji tennisçi boldy. Emma ol bu netijä 41 ýaryşyň dowamynda ýetdi we bu hem täze rekord boldy.
Madriddäki ýaryşyň finalynda Sinneriň garşydaşy Aleksandr Zwerew ýa-da Aleksandr Bloks bolar. Baýrak gaznasy 8,235 million ýewro deň bolan Madriddäki ýaryş 3-nji maýda tamamlanar.
