Renault kompaniýasy amerikan suratkeşi Joşua Waýdes bilen hyzmatdaşlykda Twingo E-Tech Electric elektrik ulagynyň üýtgeşik görnüşini görkezdi. Grafik eskiz stilinde dizaýn edilen awtoulag brendiň täze sungat taslamasynyň merkezi bölegine öwrüldi, ol hakyky durmuşdaky ulagy iki ölçegli suratyň wizual illýuziýasyna öwürýär.
Bu eser Parižde Renault Carwalk meýdançasynda görkezildi. Bäş günüň dowamynda myhmanlar awtoulagyň özgeriş prosesini hakyky wagt režiminde synlap bildiler. Indi taýýar eksponat 9-njy iýuna çenli görkeziler.
Awtoulagyň dizaýny diňe ak-gara reňk palitrasynda saklanýar: kuzow el bilen çekilen eskizi gaýtalaýan täsirli kontur çyzyklary bilen örtülen. Wizual taýdan ýönekeýleşdirilendigine garamazdan, modeliň ähli esasy elementleri, ýagny optikasy, arkalary we bamperleri doly tanalýan görnüşinde galýar.
Bu taslama Renault kompaniýasynyň häzirki zaman suratkeşleri bilen hyzmatdaşlyk etmek boýunça başlangyjynyň bir bölegi hökmünde amala aşyryldy. Twingo brendiň iň meşhur modelleriniň biri hökmünde saýlandy, onuň E-Tech wersiýasy elektrik awtoulaglary döwrüne geçilýändigini alamatlandyrýar.
Tehniki taýdan awtoulag önümçilik standartynda we üýtgewsiz galdy. Taslamanyň esasy maksady awtoulag öndürijileriň öz tehnologik täzeliklerini öňe sürmekde dizaýny we sungaty nähili ulanyp biljekdigini görkezmekdir.
