Huawei kompaniýasy 2025-nji ýylyň ahyrynda hataryň resmi tanyşdyrylyşyndan soň Hytaýyň daşynda satuwa çykaryljak Nova 15 we Nova 15 Pro smartfonlarynyň global wersiýalarynyň tehniki häsiýetnamalaryny mälim etdi.
Hataryň başlangyç modeli bolan Huawei Nova 15-e 6,7 dýuýmlyk OLED-displeý ornaşdyryldy we ol Kirin 8020 bir kristally ulgamynyň binýadynda işleýär. Enjam 100 Wt kuwwatynda çalt zarýad beriş ulgamyny goldaýan 6000 mAs sygymly güýçli akkumulýator bilen üpjün edildi. Onuň surat almak mümkinçilikleri 50 Mp esasy kamera, 3 esse optiki zumly tele-obýektiw, portret moduly we 50 Mp-lik öňdebaryjy selfi-kamerasy arkaly hödürlenýär.
Has ýokary derejeli Nova 15 Pro wersiýasy bolsa üýtgedilen dizaýny we iň ýokary ýagtylygy 4000 nite ýetýän 6,84 dýuýmlyk LTPO-ekrany bilen tapawutlanýar. Bu smartfon Kirin 9010S çibine daýanýar we has uly, ýagny 6500 mAs sygymly akkumulýatora eýedir.
"Pro" modeliniň kameralar ulgamyna goşa frontal modul we makrosýomka hem-de masştablandyrmagyň giňeldilen funksiýalary bolan esasy ulgam girýär. Täze modelleriň ikisi hem emeli aň gurallary oturdylan EMUI 15 ulgamy arkaly işleýär. Häzirki wagtda enjamlaryň bölek satuw bahalary baradaky maglumatlar entek aýan edilmedi.
