Mercedes-Benz kompaniýasy täzelenen EQS 2027 elektrik sedanyny tanyşdyrdy. Bu täze modeliň iň uly üstünligi, WLTP aýlawyna görä bir gezekki zarýad bilen geçýän aralygynyň (ätiýaçlyk ýolunyň) 926 kilometre çenli artdyrylmagydyr.
Esasy tehniki üýtgeşme hökmünde 800 woltluk arhitektura geçilmegi we 350 kWt kuwwatyna çenli hemişelik tok bilen çalt zarýad beriş mümkinçiligi görkezilýär. Öndürijiniň bellemegine görä, amatly şertlerde bary-ýogy 10 minudyň içinde awtomobiliň ýöriş aralygyny 320 kilometre çenli dolduryp bolýar. Şeýle-de, akkumulýatoryň täze himiýasy we materiallary arkaly batareýanyň sygymy artdyryldy we energiýa netijeliligi gowulandyryldy.
Brendiň tapgyrlaýyn modelleriniň arasynda ilkinji gezek sim arkaly dolandyrylýan rul ulgamy (steer-by-wire) we internet arkaly täzelenmeleri goldaýan täze MB.OS operasion ulgamy ornaşdyryldy. MBUX multimediýa ulgamynyň interfeýsi has giňeldilen emeli aň mümkinçiliklerine we bulut hyzmatlary bilen integrasiýasyna eýe boldy.
Beýleki täzelenmeleriň hatarynda has güýçli rekuperasiýa ulgamy, öňdebaryjy mikroswetodiodly yşyklandyryş, öňünden çaklaýjy sazlamalary bolan kämilleşdirilen pnewmopodweska we ikitaraplaýyn zarýad beriş (V2G we V2H) funksiýasy bar. Şeýle-de, awtomobile HEPA-filtrasiýa we howpsuzlyk kemerleriniň ýyladylyşy ýaly täze komfort funksiýalary goşuldy.
Germaniýada täzelenen EQS eýýäm sargyt etmek üçin elýeterli bolup, onuň bahasy takmynan 94 müň ýewrodan başlanýar
