ABŞ-nyň Federal awiasiýa müdiriýeti (FAA) we Ulag ministrligi kadr ýetmezçiligi meselesini çözmek maksady bilen, wideooýun muşdaklaryny awiadispetçerlige çekmek boýunça giň gerimli kampaniýa başladylar.
Kampaniýanyň çäginde taýýarlanan täze mahabat wideosy Xbox One logosy bilen başlap, çalt ritmli tehno-sazlaryň astynda meşhur wideooýunlardan bölekleri görkezýär. Wideonyň «Bu oýun däl. Bu — karýera» diýen şygary, oýun oýnamak arkaly gazanylan ukyplaryň her gün amala aşyrylýan 45 müň uçuşyň howpsuzlygyny üpjün etmekde kämil binýat bolup biljekdigini nygtaýar.
ABŞ-nyň ulag ministri Şon Daffi oýunlara bolan höwesiň çalt pikirlenmek, ünsüňi jemlemek we çylşyrymly ýagdaýlary dolandyrmak ukyplaryny ösdürmäge kömek edýändigini belledi. Ministrligiň hasaplamalaryna görä, degişli endikleri bolan adamlaryň bu işe çekilmegi hünärmenleri taýýarlamak döwründe okuwdan çykýanlaryň 30 göterimlik derejesini aşak düşürmäge ýardam eder. Häzirki wagtda ulgamda doly üpjünçilik derejesine ýetmek üçin 3000-e golaý sertifikatly dispetçer ýetmezçilik edýär.
Täze maksatnama örän amatly maliýe şertlerini hödürleýär: üç ýyllyk iş tejribesinden soňra ortaça ýyllyk aýlyk haky 155 000 dollara ýetýär. Geýmerleri işe almakdan başga-da, hökümet tejribeli hünärmenleriň öz kärinde has uzak galmagyny gazanmak we awiasiýa howpsuzlygyndaky kadr gapma-garşylygyny azaltmak üçin hereket edýän işgärlere täze bonuslary hem-de höweslendirmeleri girizdi.
