2026-njy ýylyň 14-nji iýunynda Ak tamyň Günorta meýdançasynda geçirilmegi meýilleşdirilýän UFC Freedom 250 turniri, diňe bir promouşeniň däl, eýsem tutuş sport taryhyndaky iň uly we täsirli wakalaryň biri bolar. Bu çäre ABŞ-nyň garaşsyzlygynyň 250 ýyllygyna we prezident Donald Trampyň 80 ýaşyna bagyşlanar.
Promouşen bu çäräni guramak üçin takmynan 60 million dollar sarp eder. Prezident rezidensiýasynyň çäginde ýörite ot düşeler we oktagon gurlar.
Liganyň ýolbaşçysy Dana Waýt strimer Edin Ross bilen söhbetdeşlikde turnire päsgel berip biljek meseläniň bardygyny boýun alyp, şeýle diýdi:
– Biz ýaramaz howa seretmän söweşeris. Hatda güpläp gar ýagsa-da, şeýderis. Belki ýagyşam ýagar, gögem gümmürdär, şouny olaram saklap bilmez. Ýöne, ine, ýyldyrym çaksa welin, mesele döräp biler. Adamçylyk, birden şeýle bolaýsa, biz garaşmaly bolarys we ýagdaý kadalaşansoň söweşi dowam ederis.
Men şeýle ýagdaýlar üçin daşarda şou etmegi halamok. Elbetde, ýagyş, güýçli ýel, yssy howa we mör-möjekler açyk howada bolýan kynçylyklar. Ýöne biz hemme zada taýýar. Her näme bolsa-da, biz bu turniri geçireris.
Turnirde 6 sany duşuşyk yglan edildi we olaryň her birinde amerikan söweşijileri bar.
Ýeňil agramda wagtlaýyn çempion amerikan Jastin Geýji (27-5) bilen esasy çempion, gruzin-ispan söweşijisi Iliýa Topuriýanyň (17-0) arasyndaky kemer birleşdiriji tutluşyk bolar.
Braziliýaly Aleks Pereýra agyr agramda wagtlaýyn titul ugrunda fransuz Siril Gan bilen söweşer. Eger Pereýra ýeňiş gazansa, UFC taryhynda üç dürli agram derejesinde kemer eýelän ilkinji söweşiji bolar.
