Life Biosciences biotehnologiýa kompaniýasy şu ýyl ýaş bilen baglanyşykly üýtgeşmelere garşy göreşmek üçin, öýjükleri bölekleýin täzeden programmirlemek usulynyň ilkinji kliniki synaglaryna başlamagy meýilleşdirýär diýip, Nature habar berýär.
Bu barlagyň maksady köne öýjükleri kök öýjüklere öwürmezden, olary ýaşlyk ýagdaýyna howpsuz gaýtaryp getirmegiň mümkindigini-däldigini barlamak bolup durýar.
Bu tehnologiýa uly öýjükleri embrion ýaly öýjüklere öwrüp bilýän transkripsiýa faktorlarynyň (Ýamanaka faktorlary) açylmagyna esaslanýar.
Barlagçylar rak keseliniň ösmegine sebäp bolýan c-Myc belogyny aradan aýyrmak bilen, dört faktoryň üçüsini ulanmagy meýilleşdirýärler. Birinji tapgyrda bejergi, wirus geniniň geçirilmegi arkaly, göz torunyň zeper ýeten optik nerw dokumasyny dikeltmek üçin, glaukomaly 12 hassada synagdan geçiriler.
Bu usulyň howpsuzdygy syçanlarda we maýmynlarda geçirilen synaglarda eýýäm tassyklanyldy, netijede hiç hili goşmaça täsir ýa-da çiş ýüze çykmady. Genler ýörite antibiotik-açar arkaly işjeňleşdiriler we synaga gatnaşyjylar bäş ýyllap gözegçilik astynda bolar.
Eger synag üstünlikli geçse, bu tehnologiýa möhüm beden agzalaryny we tutuş bedeni ýaşartmak üçin esas bolup biler.
Bostonyň Life Biosciences kompaniýasynyň esaslandyryjylarynyň biri Garward lukmançylyk mekdebinde garramagy öwrenýän ylmy direktor Lu Dewid Sinklerdir. Ol garrama garşy ulanyp boljak usullar barada batyrgaý pikirleri öňe sürýändigi üçin, köplenç, beýleki ylmy barlagçylar tarapyndan tankyda sezewar bolýar.
