Halkara ýeňil atletika federasiýalarynyň assosiasiýasy (World Athletics) özüniň resmi saýtynda 2030-njy ýyldan başlap, marafon ylgawy boýunça aýratyn dünýä çempionatynyň dörediljekdigini yglan etdi.
Ilkinji ýaryşy Afina şäherinde geçirmek meýilleşdirilýär. Gresiýanyň ýeňil atletika federasiýasy (SEGAS) bilen gepleşikler eýýäm başlandy. Marafon boýunça dünýä çempionaty her ýyl geçirilýän çäre bolar, şunda erkekleriň we zenanlaryň arasyndaky ýaryşlar gezekli-gezegine geçiriler. Bu bolsa häzirki wagtda iki ýyldan bir gezek geçirilýän dünýä çempionatlaryndaky ýaly yzygiderliligi saklamaga mümkinçilik berer.
«Biz marafon ylgawynyň dörän ýeri bolan Afina bilen bu ugur boýunça aýratyn dünýä çempionatyny geçirmek mümkinçiligini öwrenýäris. Sportda ähmiýeti we täsiri boýunça marafon bilen bäsleşip biljek çäreler örän azdyr, ol bir wagtyň özünde hem iň ýokary derejeli synag, hem-de köpçülikleýin gatnaşygyň baýramçylygydyr. Bu marafon ylgawyna bagyşlanan ählumumy baýramçylygy onuň mirasyna hormat goýulýan ýerde döretmek, şol bir wagtda global ylgaw jemgyýetçiliginiň gerimini we ruhuny görkezýän döwrebap çempionaty kemala getirmek üçin mümkinçilikdir» – diýip, World Athletics guramasynyň ýolbaşçysy Sebastýan Kou belledi.
Marafon ýaryşlary 2027-nji we 2029-njy ýyllarda geçiriljek adaty ýeňil atletika boýunça dünýä çempionatlarynyň çäklerinde saklanar, ýöne şondan soň olar esasy programmadan aýrylar. Şosse ylgawy boýunça dünýä çempionaty ozalkysy ýaly aýratyn we ýyllyk çäre hökmünde geçiriler.
