«Arsenalyň» we Welsiň milli ýygyndysynyň öňki ýarymgoragçysy Aaron Remzi futbol karýerasyny tamamlaýandygyny habar berdi.
«Bu çözgüde gelmek maňa aňsat düşmedi. Uzak wagtlap oýlanmadan soň, futboldan gitmeli diýen netijä geldim. Ilki bilen, Welsden başlamak isleýärin. Welsiň milli ýygyndysynyň futbolkasyny geýmek we onuň bilen köp sanly ajaýyp pursatlary başdan geçirmek meniň üçin uly mertebe boldy. Bile işleşen ähli tälimçilerimiň we maňa köp babatda ýardam beren işgärleriň uly goşandy bolmazdan, bular mümkin bolmazdy.
Ikinjiden, oýnamak miýesser eden ähli klublaryma minnetdarlyk bildirýärin. Arzuwymy amala aşyrmaga we iň ýokary derejede oýnamaga kömek eden ähli tälimçilere we işgärlere sagbolsun aýdýaryn.
Şeýle hem aýalyma, çagalaryma we tutuş maşgalama uly sagbolsun aýdýaryn. Eger siz meniň ýanymda bolmadyk bolsaňyz, bularyň hiç biri mümkin bolmazdy» – diýip, Remzi sosial torlarda ýazdy.
35 ýaşly futbolçynyň soňky kluby Meksikanyň «Pumas» topary boldy, ol bu klubdan 2025-nji ýylyň oktýabr aýynda gaýdypdy. Şeýle hem Remzi «Kardiff», «Nissa», «Reýnjers», «Ýuwentus», «Arsenal» we «Nottingem Forest» ýaly klublarda çykyş etdi.
Ýarymgoragçy üç gezek Angliýanyň Kubogyny we Superkubogyny gazandy, bir gezek Italiýanyň çempiony, Kubogynyň we Superkubogynyň eýesi boldy, şeýle hem bir gezek Şotlandiýanyň Kubogyny eýeledi.
Remzi Welsiň milli ýygyndysynda 86 oýna gatnaşyp, 21 gol geçirdi. Ol milli ýygyndynyň taryhynda iň köp oýun geçiren futbolçylaryň arasynda altynjy orny paýlaşýar we iň gowy bombardirleriň sanawynda altynjy orunda durýar.
