«Arsenal» Çempionlar ligasynyň ýarym finalynyň jogap duşuşygynda «Atletikony» 1:0 hasabynda ýeňdi. Iki oýnuň netijesi boýunça london kluby 2:1 hasabynda ýeňiş gazanyp, soňky 20 ýylda ilkinji gezek finalda oýnamaga hukuk gazandy.
Oýundaky ýeke-täk gol birinji ýarymyň ahyrynda geçirildi. Leandro Trossaryň urgusyndan soň derwezeban Ýan Oblak topy yzyna gaýtardy, emma Bukaýo Saka topa birinji bolup ýetişdi we ony dessine derwezä ýollady.
Duşuşygyň ahyryna çenli «Arsenal» goragda hatyrjem oýnap, garşydaşyna howply pursatlary döretmäge maý bermedi we netijede ýeňşini goramagy başardy.
Oýnuň iň gowy futbolçysy diýlip «topçularyň» ýarym goragçysy Deklan Raýs saýlandy.
«Arsenal» Çempionlar ligasynyň şu möwsüminde enteg-ä ýeňilmezekligini elden bermän barýar. Topar özüniň ýeňilmesiz oýunlar tapgyryny 14 duşuşyga ýetirip, klubuň täze rekordyny goýdy. Mundan başga-da, Artetanyň şägirtleri şu möwsümde ähli ýaryşlarda 41-nji ýeňşini gazanyp, 1970/71 möwsüminde goýlan rekordy gaýtaladylar.
Finalda «Arsenal» «Pari Sen-Žermen» bilen «Bawariýa» oýnunyň ýeňijisi bilen duşuşar. Bu toparlaryň arasyndaky oýun 7-nji maýa geçilýän gije bolar.
Final duşuşygy 30-njy maýda Budapeştdäki «Puşkaş Arena» stadionynda geçiriler.
