Hyundai kompaniýasy «uly bir zadyň gelýändigini» habar berýän tizer suratlaryny çap etdi, bu bolsa ähtimal täze modeliň ýakyn wagtda boljak tanyşdyrylyşyna yşarat edýär. Suratlaryň özünde awtoulag ýok — diňe asmanda gaýyp duran kub şekilli daş we oňa goşulan ýazgy görkezilýär.
Täze önümiň premýerasy 1-nji aprelde Nýu-Ýork awtosalonyň çäginde meýilleşdirilýär, serginiň özi bolsa 3-nji aprelden 12-nji aprel aralygynda geçiriler. Kompaniýa munuň degişme däldigini aýratyn nygtady. Beýleki jikme-jiklikler häzirlikçe aýan edilmeýär.
Daşyň şekiliniň geljekki modeliň dizaýnyna yşarat edip biljekdigi çaklanylýar. Soňky ýyllarda Hyundai öz awtoulaglarynda has burçly çyzyklary ýygy-ýygydan ulanýar.
Çaklamalaryň birine görä, gürrüň mundan ozal gyşky synaglarda göze ilen täzelenen "Tucson" krossoweri barada barýar. Başga bir wersiýa görä bolsa, kompaniýa özüniň ilkinji ramaly pikabyny taýýarlaýar. Şeýle hem, ýolsuz ýerler üçin niýetlenen "Crater" konseptiniň seriýaly önümçilige ýakynlaşdyrylan görnüşiniň hödürlenjekdigi barada çaklama bar.
Tanyşdyryş dabarasyna kompaniýanyň ýolbaşçysy Hose Munos, Demirgazyk Amerika bölüminiň ýolbaşçysy Rendi Parker we brendiň dizaýnerleri gatnaşarlar.
Awtosalonda şeýle hem ilkinji gezek "Infiniti QX65" krossoweri — "Infiniti FX" modeliniň mirasdary diýlip atlandyrylýan kross-kupe görkeziler.
