Paleontologlar Günorta Koreýada tapylan kiçi dinozawryň täze görnüşini suratlandyrdylar. Doolysaurus huhmini diýlip atlandyrylan bu dinozawr, takmynan, 113–94 million ýyl mundan ozal, hek döwründe ýaşap geçipdir.
Galyndylar 2023-nji ýylda Aphe adasynda tapyldy. Alymlar kelleçanagyň böleklerini, oňurgalary, art aýak süňklerini we gastrolitleri - dinozawryň iýmitini siňdirmek üçin ýuwdan daşlaryny tapdylar.
Barlag mikrokompýuter tomografiýasy arkaly geçirildi, bu bolsa süňkleriň içki gurluşyny olara zyýan ýetirmezden barlamaga mümkinçilik berdi. Netijeler Fossil Record žurnalynda çap edildi.
Alymlar tapylan nusganyň iki ýaşynda bolandygyny çaklaýarlar. Ol takmynan hindi towugynyň ululygynda bolupdyr, ululary bolsa ondan iki esse uly bolup biler. Dinozawryň bedeniniň tüý bilen örtülen bolmagy mümkin diýlip çaklanylýar.
Bu açyş möhümdir, sebäbi Koreýada gowy saklanyp galan dinozawr skeletleri seýrek duş gelýär. Bu ýurtda soňky 15 ýylyň içinde beýan edilen ilkinji täze görnüş we kelle bölekleri bilen tapylan ilkinji tapyndydyr.
