Aziýa futbol konfederasiýasy (AFK) 2027-nji ýylda Saud Arabystanynda geçiriljek Aziýa Kubogynyň final tapgyrynyň bije çekişlik dabarasyny näbelli möhlete geçirdi. Aslynda bu çäre 2026-njy ýylyň 11-nji aprelinde Er-Riýad şäherinde geçmelidi.
Täze ýagdaý hakda guramanyň resmi saýtynda: «Bu karar ähli degişli taraplaryň bije çekişlik dabarasyna bökdençsiz gatnaşmagyny üpjün etmek maksady bilen, düýpli seljermelerden soň kabul edildi. AFK bije çekişlik dabarasyny meýilnama laýyklykda geçirmäge doly taýýarlygy üçin Saud Arabystanynyň guramaçylyk komitetine minnetdarlyk bildirýär» diýen görnüşde habar ýerleşdirildi.
Bu kararyň kabul edilmegine Ýakyn Gündogardaky durnuksyz syýasy ýagdaýlar we howpsuzlyk meseleleri sebäp boldy. AFK öz bähbitlerinden gatnaşyjy taraplaryň we myhmanlaryň abadanlygyny has ilerde goýdy.
2027-nji ýylyň Aziýa Kubogynyň Saud Arabystanynyň taryhynda ilkinji gezek geçiriljek iň uly futbol ýaryşydygyny bellemek gerek. Täze bije çekişligiň senesi barada goşmaça maglumat soňra mälim ediler.
