Aşgabatda küşt boýunça saýlama ýaryşy tamamlandy, onuň netijeleri boýunça türki döwletleriň arasynda geçiriljek ilkinji küşt olimpiadasyna gatnaşjak Türkmenistanyň ýygyndy toparynyň (16 ýaşa çenli küştçüler) düzümi kesgitlenildi.
Saýlama ýaryşy Ýöriteleşdirilen küşt we şaşka mekdebinde geçirildi. Oňa ähli welaýatlardan 49 sany ýaş küştçi gatnaşdy. Ýaryş şweýsar ulgamy boýunça 9 tapgyrda, her göçüme 30 sekunt goşmak bilen 45 minut wagt gözegçiliginde geçirildi.
Saýlama ýaryşynyň netijeleri boýunça ýygyndy toparyň düzümine şular girdi:
- Ali Ahmedow (Aşgabat) — 7 utuk;
- Ahmet Artykow (Mary welaýaty) — 7 utuk;
- Gurbanmyrat Rüstemow (Lebap welaýaty) — 6,5 utuk;
- Dilber Hupbyýewa (Daşoguz welaýaty) — 6,5 utuk;
- Zalina Iminowa (Aşgabat) — 6,5 utuk.
Ýaryşda has ýaş gatnaşyjylaryň hem özlerinden uly küştçüler bilen bäsleşip, üstünlikli çykyş edendikleri bellenilýär.
Olimpiada 13—18-nji maý aralygynda Gazagystanyň Türküstan şäherinde geçiriler. Oňa Azerbaýjanyň, Gazagystanyň, Gyrgyzystanyň, Türkiýäniň, Türkmenistanyň we Özbegistanyň ýaşlar toparlary gatnaşar.
Şol bir wagtyň özünde, Almaty şäherinde uly ýaşly toparlaryň arasynda hem ýaryşlar geçiriler, olar Samarkantda boljak 46-njy Bütindünýä küşt olimpiadasyna taýýarlyk tapgyry hökmünde görülýär.
Şeýle hem Türkmenistan Türki küşt assosiasiýasyny döretmäge gatnaşýar. Ony döretmek baradaky Ähtnama 2025-nji ýylyň 20-nji oktýabrynda Astanada gol çekilipdi.
