Belli iňlis aýdymçysy Pol Makkartni «The Boys of Dungeon Lane» atly täze solo albomynyň taýýardygyny buşlady. Albomyň çykmaly senesi 29-njy maýa meýilleşdirilýär. Täze ýazgy ähli striming platformalar bilen birlikde disklerde hem satuwa çykarylar. «Toýdan topukça» diýen ýaly, albomyň ilkinji singli «Days We Left Behind» diňleýjilere eýýäm elýeter edildi.
Metbugat beýanatynda täze albomyň aýdymçynyň uruşdan soňky Liwerpuldaky durmuş bilen bagly çagalyk ýatlamalaryna, öz maşgalasyna hem-de «The Beatles» dünýä meşhur bolmazyndan öňki döwürlerdäki Jon Lennon we Jorj Harrison bilen bolan dostlugyna bagyşlanýandygy bellenilýär. Albomyň ady hem, Makkartniniň maşgalasynyň ýanaşyk ýaşan ýeri bolan – şäheriň işçiler etrabyndaky Dandjen-leýn köçesi bilen baglydyr.
Alboma 14 sany aýdym girdi:
1) «As You Lie There»;
2) «Lost Horizon»;
3) «Days We Left Behind»;
4) «Ripples in a Pond»;
5) «Mountain Top»;
6) «Down South»;
7) «We Two»;
8) «Come Inside»;
9) «Never Know»;
10) «Home to Us»;
11) «Life Can Be Hard»;
12) «First Star of the Night»;
13) «Salesman Saint»;
14) «Momma Gets By».
Makkartni «Days We Left Behind» aýdymy barada şeýle gürrüň berýär:
«Bu aýdym, meniň üçin köp babatda ýatlama diýsek, dogry bolar. Albomyň ady hem şu aýdymyň bir setirinden alyndy. Men köplenç geçip giden günler barada oýlanýan, öz-özümden: «Men diňe geçmiş barada ýazýan ýalymy?» diýip soraýan. Soňundanam: «Eýsem, dagy näme hakda ýazyp bolar?» diýip, jogap berýän. Çünki mende Liwerpul barada ýatlamalar gaty kän».
Makkartniniň mundan öňki «McCartney III» atly solo albomy 2020-nji ýylyň dekabrynda çykypdy. 2021-nji ýylyň aprelinde bolsa ol albom Bek, Ed O’Braýen (Radiohead), Deýmon Albarn (Blur, Gorillaz) ýaly meşhur artistler bilen bilelikde remiks görnüşinde gaýtadan işlenip çykarylypdy.
